BLOGGER TEMPLATES AND TWITTER BACKGROUNDS

9/25/09

مشهد



أستيقظت-كالعادة- متأخراً ، بسرعة أرتديت ملابسي ونزلت متجها نحو الجامعه ، وعلي الرغم من أن المسافة بين الكلية وبين المدينة الجامعية-حيث أقيم-لاتتعدي ربع الساعة علي الأقدام ، إلا إنني دائماً أكون أخر من يدخل مدرج المحاضرات ، وعندما يسألني أحد المحاضرين عن سبب تأخري أتعلل بزحام المواصلات ، يبتسم زملائي ، أعلم ما يقوله كل منهم لنفسه في تلك اللحظة ..... "كاذب"..!!

تأخذ جامعه القاهرة شكلا مربعاً ، وتقبع كلية الهندسة –وهي الكلية التي أدرس بها-مواجهة لأحد أضلاع المربع ، كما تقع المدينة الجامعية في مواجهة ضلع أخر يُشكل مع الأول زاوية قائمة ، ونظراً لأن طول وتر المثلث القائم أقل من مجموع طولي ضلعي القائمة ،يكون أقصر الطرق للوصول للكلية عبر الجامعه وليس من خارج أسوارها ، وهو الطريق الذي أتخذه كل يوم ..

أمشي مسرعاً ، أحاول اللحاق بمحاضرة لا أعلم هل سأفهم محتواها أم لا ، لكني أعلم جيداً مدي احتياجي لدرجات الحضور في تلك المادة ، أثناء سيري أخرج جدول المحاضرات من حقيبتي لأتأكد من مكان المحاضرة ، ثم أكمل سيري ، وعندما وصلت عند باب الجامعه الرئيسي .. وهو الباب الذي أخرج منه... وجدتها أمامي ...

لم أُصدم لمظهرها كثيراً ، فخلال خمس سنوات في الجامعه اعتدت رؤية مثيلاتها ، فقد أصبح من الصعب الأن أن تفرق بين طالبات الجامعه وفتيات الليل ، كانت ترتدي أقصر وأضيق ما يمكن ارتداؤه ، ناهيك عن كمية مساحيق التجميل التي تغطي وجهها ، لم أطل النظر إليها كثيراً ، فقد سمعت ما صدمني بحق ، سمعت صوتاً من خلفي يقول " عليا النعمة أبوكي ده راجل  ..... " ...................

من مظهره يبدو عليه إنه طالب بالجامعه ، أي إنه ليس أحد العمال أو السعاة ، هو طالب .. زميل لي .. ولها .....!! لم تعره إهتماماً وتظاهرت بأنها لم تسمعه رغم قوة ووضوح صوته ، واصل كل منهما طريقه فواصلت طريقي لخارج الجامعه ، تزاحمت بداخلي الأفكار والأسئلة ، هي بالتأكيد تراه مخطئاً .. أوافقها علي ذلك ، وهو .. إن لم يكن يراها مخطئة ما فعل ذلك ، أوافقه علي كونها مخطئة ... لكني أري خطأها لا يبرر خطأه .. فهو كمثل من يتحرش بالفتيات معللاً ذلك بعدم احتشامهن ، كما أنه في جامعات أوروبا وأمريكا ، وهي الدول التي تصنع الموضة التي ننقلها حرفياً إلي مجتمعاتنا دون تمييز ، لانجد فيها من يبالغ في مظهره بهذا الشكل ، لكن تُري .. هل يستحق والدها أن يوصف بال " ... " ؟؟ ، هل رأي ابنته وهي تخرج من المنزل مرتدية مثل هذا الزي ؟؟ ، تُري هل من الممكن أن يكون هناك قانون يمنع ارتداء ملابس بمثل هذا الانحلال في الجامعه ؟؟ ، وإذا طُرِحَت الفكرة ماذا سيكون رد جمعيات حقوق المرأة ؟؟ ، هل توافق عليه حفظاً لبناتنا ، واحتراماً لقدسية الحرم الجامعي ؟؟ ، أم تعترض علي أساس أن " المرأة حرة ومن حقها تقلع اللي هي عاوزاه " .. ؟، تري لو وُضِعَ قانون يُجرم التلفظ بالالفاظ الخارجة وجعلت عقوبته الحبس ، كم دقيقة تستلزم لكي تمتليء السجون عن أخرها ؟، من المسئول عن جعل جامعاتنا وشوارعنا تصبح مثل نادٍ كبير للتعري ، ومن المسئول عن جعل نفس الأماكن مستنقعاً للألفاظ الخارجة ؟، هل هو نحن .. أم الحكومة .. أم الغزو الغربي .. أم انعدام الثقافة .. أم سوء التربية .. أم البعد عن الله .. أم .. أم .. أم ........؟؟؟؟؟؟؟؟

أخرجني صوت أبواق السيارات من دوامة الأسئلة ، ليذكّرني بأن عليّ عبور الطريق ، نظرت في ساعتي ، وقبل أن أعبر الطريق رفعت بصري إلي السماء ....... وتوجهت لهما.. ولغيرهما .. بالدعاء .....................


62 رأيك:

Yusuf said...

أول تعليق

محجوز ل دموع القمر

ربنا يرجعهالنا بألف سلامة

دعاء مواجهات said...

العيب ضعف فى النفوس ومبررات ساذجة وبالية

من لم تردعة نفسة فلن تردعة القوانين

الاخلاق لا تباع ولا تشترى

كل منهم يرى ان مايفعله هو حقة المطلق

وفى السماء فقط تكمن الحقائق

افضل فعل عملتة هو الدعاء حقاً

تحياتى لك

(Joudy) said...

بصراحة اللى بتسال عنه ده مش عارفة حقيقى حله فين بس اللى متأكده منه إننا اتبلينا فى دينا أكيد حقيقى مش عارفة اقولك ايه اقولك زمان كان الجيب قصير ومفيش تحرش ولا أقولك احنا اتغيرنا ومبادئنا أصبحت بتتجزأ ولا ولا الموضوع أصله مش كلمتين الموضوع إننا اتغيرنا والحال بقى غير الحال

تقبل مرورى ويارب أكون ضيفة خفيفة على قلبك

دمت بكل الخير والسعادة

الازهرى said...

أول حاجه نا اول واحد هيرفض القانون ده ليه ؟
لنفس اسباب وجود الاشكال دى
وهى انهم بعدوا عن الله سبحانه وتعالى وفقدوا قيمهم الثقافيه والتاريخيه
وبدأوا فى التشبه بقيم وثقافات تانيه
والحل مش فى الحجر بالعكس دا هيقابل برد عنيف وتمسك اكتر
الحل انك ترجعهم تانى للخط الصح وتخليهم يفهموا خطأ تصرفاتهم
أما بخصوص معرفة والدها فكان ف موقف حصل بينى وبين مدرس فقال لى جمله حلوة جدا

ان كنت تدرى فتلك مصيبة وان كنت لا تدرى فالمصيبة أعظم

أما بالنسبة للشاب فنس التعليق هو هو

تحياتى دوما

wella said...

اول حاجة انا بردة ساكنه مدينة ويادوب بين الجامعة والمدينة الجامعية ربع ساعة بس ديما اوصل متاخرة انا وصحبتى معرفش لية
بجد فى اول مقطع حسيتك بتتكلم عنى برضة كلية هندسة وبرضة مدينة جامعية وبرضة بوصل متاخر

اقعدت اضحك اوى الحمدالله مش طلعت لوحدى بتاخر



اما بالنسبة للبنات اللى بيلبسوا محزق وملزق ربنا يهديهم بس
مش عارفة بجد يعنى من كتر مالبس ديق ومنافى او للحجاب مستمرين يلبسوا الطرحة مش عارفة على اية


اعتقد جمعيات حقوق المراه هتعترض طبعا

تعترض علي أساس أن " المرأة حرة ومن حقها تقلع اللي هي عاوزاه " .. ؟


مش عارفة بس اذا كان انا بنت وبيلفت نظرى اللى البنات بتعمله وبعد اتفرج عليهم انتوا باه ياشباب هتعملوا ايه

ربنا يهدى قول امين،

Yusuf said...

دعاء مواجهات

وفي السماء ..... يكمن الدواء

Yusuf said...

Joudy

الجيب بتاع زمان كان غلط
والضيق بتاع دلوقتي برضه غلط
والناس اللي بتعاكس غلط
والناس اللي بتتحرش غلط

تفتكري امتا ممكن نشوف حاجة صح

نورتي المدونة

Yusuf said...

الازهري

ان كنت تدرى فتلك مصيبة وان كنت لا تدرى فالمصيبة أعظم

انت كده لخصت البوست ف جملة واحدة

نورت

Yusuf said...

wella

كمان ف هندسة وف المدينة وبتروحي متأخر

ده ايه التطابق ده

بصي انا حاولت افسر موضوع النص ايشارب اللي بيتلبس علي لبس ضيق وقصير وتقريبا هو يا اما الحجاب نازل موضة يا اما البنت بتبقا مكسلة تسرح شعرها

ومن ناحية تانية

الشباب المفروض يلتزموا الصمت
بس للأسف كل واحد بيتصرف حسب تربيته

تقبلي تحياتي

norahaty said...

الأسباب كثيرة
غياب القدوة الحسنة
ووضوح القدوة السيئة وللاسف
وتسليط الضوء عليها فى الاعلام والاعلانات وخلافه .بلدنا رايحة لنهاية وحشة اوى لو حالنا ما أتصلح بس حتصلح ازاى ومين اللى حيصلحه.عارف انا بسأل نفسى لما النموذجين اللى انت قلت عليهم دول حيبقوا اب وأم
اولادهم حيبقى شكلهم ايه؟
وحيربوهم على ايه؟
وبطل تروح متأخر
اصحى بدرى وروح
بدرى علشان تبقى
قدوة لغيرك
مش كده ولا ايه؟
تدوينة حلوة اوى يايوسف

بيطرية ومش بايدى said...

السلام عليكم اولا
بجد كلامك صح بس اقولك مين المسئول نحن عشان احنا بايدينا بعدنا عن ربنا
تصور معايا كده فيها ايه يعنى لو طبقنا كل كلمة فى دينا على حياتنا دينا عمره ما كان عسر ابدا يعنى عمرنا ماكنا هنكون كلنا منقبات ولا كل الرجالة لابسين جللايب
لو كل واحد فكر قبل ما يعمل اى تصرف او يلفظ اى قول يسأل نفسه سؤال

ياترى كنت هاعمل ايه لو الرسول كان واقف معايا هنا دلوقتى؟؟؟؟؟؟؟؟

طب ده الرسول مابالكم بقى برب الرسول

عارف الحكومة هى عايزة كده عايزة الناس على طول بعيدة عن ربنا فبتيح للغزو الغربى انه يدخل بكل حرية ويتأصل فى الشباب وتنعدم عندهم اى ثقافة تانية سواء دينية او عامة حتى

اما بقى سوء التربية فممكن يكون سبب كبير بس انا شايفة ان معظم الابهات والامهات هما اللى عايزين تربية

يلا طولت عليك
ربنا يهدينا ويهدى الجميع

تحياتى لك
فى حفظ الله ورعايته

fL0weR-giRL said...

اممممممممممممممم بصراحه عندك حق بقت حاجه لاتطاق

اللهم احفظنا

** تقبل مروري **

beautiful mind said...

yusuf

ازيك يا باشمهندس يا عسل
يارب تكون عيدت كويس
نيجي بقي لكلامك الجميل
تصدق الواد اللي علق علي لبس البنت انا موافق معاه جدا
بغض النظر عن اللفظ اللي قاله
فعلا اكيد دول خارجين من بيوت مفككه
واهاليهم ملهومش لازمه اساسا
وميعرفوش ان كلكم راع وكلكم مسؤل عن رعيته
تقبل تحياتي يا يوسف
والسلام ختام

همس الارواح !! said...

السلام عليكم

البوست جميل جدا

وعلى فكره اللى حضرتك قلته بيحصل كتير وبنشوفه كل دقيقه

وده بيرجع لغياب الدين اولا والتربيه والاخلاق وكمان التقليد الاعمى اللى لا يتماشى مع شرقيتنا ولا مع ديننا

وربنا يستر على بناتنا والله

تحياتى :)

7annen said...

اللهم استر بنات المسلمين

المنظر دا موجود كل يوم وكل دقيقه

بس العيب على الاهل اللى يسمحوا لبنتهم انها تخرج كدا

اللهم احفظنا

حنين

شمس النهار said...

كل سنه وانت طيب
بجد
الموضوع بقي عايز وقفه ووقفه جامده
حتي داخل الحرم الجامعي كمان

ده عليه العوض ومنه العوض
الناس دي هي اللي بكره تربي جيل وتمسك البلد

ان لله وان اليه راجعون

Yusuf said...

norahaty

لما النموذجين دول يبقوا أب وأم

هيجيبوا أولاد يعيدوا نفس المأساة للأسف

انا حطيت الجزء الاولاني ده ف التدوينة عشان ابين ان الراوي بشر برضه ومحدش معصوم من الخطأ غير ربنا سبحانه وتعالي

وعشان خاطرك نروح من بدري

نورتي يادكتورة

Yusuf said...

بيطرية ومش بأيدي

عليكم السلام ورحمة الله وبركاته

فعلا عندك حق

ياتري لو كل واحد فكر ان ربنا مطلع عليه قبل ما يعمل أي حاجة ياتري ده كان هيبقا حالنا؟؟؟

رأيك ف الصميم

نورتي

Yusuf said...

fL0weR-giRL

فعلا
غض البصر بقا أمر صعب ف الزمن ده

وكمان الكلام اللي بنسمعه

تقبلي تحياتي

Yusuf said...

beautiful mind

هيما صديقي حمد الله علي سلامتك

اسمحلي اختلف معاك

مينفعش تقول انا متفق معاه بغض النظر عن اللفظ

في قاعدة قرأنية جميلة أوي بتقول

" ادع إلي سبيل ربك بالحكمة والموعظة الحسنة"

والاخ هنا كلامه مفهوش أي حكمة .. أي موعظة .. ولا حتي أي حسنة

مهما كان مينفعش نرد الغلط بالغلط

وكل سنة وانت طيب يا جميل

Yusuf said...

همس الارواح

اهلا بيكي ف المدونة الأول

المشكلة عندنا اننا بنقلد وخلاص

الموضة بقت كلمة تسحبنا وراها من غير اي وعي ولا فهم

والمشكلة ان المسئولين عن الموضة دول ناس مبيفهموش اي حاجة ف اي حاجة

نورتي المدونة

Yusuf said...

7annen

عندك حق والله

الاستفزاز بقا ع الأخر

دمتي بكل ود

Yusuf said...

شمس النهار

كل سنة وانتي طيبة

الحرم الجامعي مبقاش ينفع يتقال عليه حرم

بقا حاجة تانية خالص

تقبلي تحياتي

yoyo said...

صباحك سكر

و الله انت اتكلمت عن ظاهرة موجودة فى كل الجامعات تقريبا وحتى فى اغلب الاماكن
احنا بنقلد الغرب بشكل اعمى ومش بنفكر لا فى دين ولا حتى اخلاق بش بنجرى ورا الموضة
ومع الاسف غياب الاهل و انشغالهم فى الدنيا وسايبنا البنات تعمل اللى هى عاوزة وبس على اساس ان دى حرية و البنت لازم تعيش حياتها
ربنا يستر علينا يارب
ويحفظنا من فتن الدنيا

تسلم والله على الموضوع المهم
تحياتى
يويو

maha zein said...

اممممممممممممممممممممممم
مش عارفة
هما الاتنين فعلا غلطانين
بس غلط مختلف عن غلط
يعني هي خطأها عظيم
و هو يمكن استثارة المنظر

و لو فكرت هتلاقيك بتتعاطف معاه

سعات البنات بتطلع عن دودها سواء في اللبس او الاخلاق
و بتبقه عاوز تكلهم بحاجة في بوزهم

هو كان ممكن علا صوتهبردو و قال اللى عوزة بس بأدب و و بلا سباب
يعنيمن الاخر كان ذكرها بربنا عيانا بيانا امام الجميع

وانت بقه يا سيدي
متبتقاش تبص
غض بصرك
لو هي عملت كده فهي هتتحاسب
لكن متوقعش نفسك انت كمان في المعصية
اهي كلها معاصي

غض البصر من افضل الاعمال لانه بيحمي صاحبه من الوقوع في المعصية

روحوا يا جدعان ربنا يهديني و يهديكوا

Yusuf said...

yoyo

صباحك زي الفل
معتقدش ان في أي حد عنده مانع ان أي بنت تعيش حياتها
بس تعيش حياتها صح
ربنا يحفظ كل بناتنا
أمين يارب العالمين

نورتي

Just Smile said...

السلام عليكم اولا مش قادرة اقولك وصف الاحداث رائع ازاي ولفت انتباهنا فالبداية رائع يا بشمهندس

الموضوع ده يااااما ناس اتكلمت فيه وياما بنشوفه اوقات الناس بتفتكره رقي منهم انهم يقلدوا غيرنا من الغرب وناسيين اننا احسن احنا عندنا مباديء ودين واخلاق

بس كمان المصيبة الكبرى غياب الغيرة على البنات والشهامة ان اب يسمح لبنته تنزل كده ظنا منه انه هيجوزها ويستريح منها ده ف حد ذاته جهل او لوجهة نظر اخرى لا اعلمها لا تبرر الموقف فين رجولته هنا وخوفه على بنته؟؟


وان بنت تبقى ماشية ف الشارع كده ومش مكسوفة من نفسها ومش مكسوفة من
ربنا ديه اسمها بجاحة


وان ولد يستغل الموقف ويقول الكلمة ديه انا عذراه بصراحة ازاي ف وسط الجامعة والبنات ديه كلها يقدر يغض بصره بنسبة 100% ديه حاجة مستحيلة ويمكن قال الكلمة اللي قالها ديه من غيظه ليس الا

ومش عارفة اضيف لان كل التعليقات قبلي لخصت مواضيه القدوة والتربية وغيرها كتير

ربنا يسترها علينا يارب
ومدونة حضرتك رااااائعة يا بشمهندس عقبالي يارب اما ابقى بشمهندسة زي حضرتك :D

Yusuf said...

maha zein

معلش ف النقطة دي انا كمان مختلف معاكي

مينفعش التمس له العذر لأن هو كمان أخطأ

"ما يلفظ من قول إلا لديه رقيب عتيد"

لازم هو كمان كان يراعي الفاظه

وفعلا عندك حق

غض البصر من افضل الاعمال لانه بيحمي صاحبه من الوقوع في المعصية

ربنا يجعل كلامك في ميزان حسناتك

تقبلي تحياتي

Yusuf said...

Just Smile

بس كمان المصيبة الكبرى غياب الغيرة على البنات والشهامة ان اب يسمح لبنته تنزل كده ظنا منه انه هيجوزها ويستريح منها ده ف حد ذاته جهل او لوجهة نظر اخرى لا اعلمها لا تبرر الموقف فين رجولته هنا وخوفه على بنته؟؟

ممكن نلخص الكلام ده ف جملة واحدة

الديوثية والعياذ بالله انتشرت

الحياء كمان بقا كلمة من الماضي

بس انا برضه لازلت ضد الولد كمان لأنه لازم يتحكم في غضبه

وزي ماقال سيد الخلق عليه الصلاة والسلام:

" ليس الشديد بالصرعة وإنما الشديد من يملك نفسه عند الغضب "

نورتي المدونة وان شاء الله تبقي باشمهندسة كبيرة

تحياتي

نهــــــــــار said...

السلام عليكم ورحمة الله وبركاته...
الخطأ من الأصل
وهو البيت
التنشأه لهذه البنت وهذا الشاب ...
........
ولو أني أرى ان خطأ الشاب أكبر
إذا زعم أن هذا المنظر مقزز وبدأ بالتعليق لما لم يخبرها بالأمر الصواب نحن نفتقد مبدأ الأخوه في الإسلام....
.........
كان الله في عونك وعون كل شاب
وهدى الله شباب وبنات الإسلام...
....
في أمان الله

زهور الامل said...

السلام عليكم

العيب مش عليها هي بس
العيب على حاجات كتيرة اوي

الاب والام اللي يعتبروا ملهمش لازمة ولا بيراعوا عيلهم اللي هما من رعيتهم ومن مسئوليتهم وكما قال رسولنا الكريم كلكم راع وكل راع مسئول عن رعيته
فين الام اللي توجه التوجيه السليم وتشرف على لبس ولادها
فين الاب اللي يقول ده عيب وده حرام وده غلط

العيب في البعد عن الدين
العيب في كترة الفلوس الحرام
العيب في الانفتاح الزايد على الغرب
العيب على وسائل الاعلام اللي ملت الدنيا بقنوات الاغاني والفيديو كليبات
العيب على الانترنت والمواقع القبيحة

العيب على ادارة الجامعة اللي مش بتفرض على الطلبة الالتزام باللبس والكلام الحشم
العيب على النفوس الضعيفة وانعدام الشخصية
العيب كمان على البطالة والعنوسة كل واحدة بتعمل في نفسها البدع علان تلحق تجيب عريس

العيب على حاجات كتير اوي
لو فضلنا نقول فيها للصبح مش هنخلص

بس اكبر عيب هو البيت والتربية والام ثم الام ثم الام

تحياتي

Yusuf said...

نهار

الخطأ من البيت
وجهة نظرك تحترم برضه

وأنا أعتقد ان الاتنين يشتركوا في درجة الخطأ

وربنا يهدي الجميع

دمتِ بود

Yusuf said...

زهور الأمل

الأب والأم ==== مينفعش لقمة العيش تشغلهم عن تربية أولادهم التربية السليمة

البعد عن الدين والانفتاح علي الغرب هما وجهين لعملة واحدة

ونتيجتهم هي الفلوس الحرام وقنوات الأغاني والمواقع اياها


ادارة الجامعه واي ادارة ف اي حتة =====اذا بليتم فاستتروا

فعلا عندك حق

العيب علي حاجات كتير

بس احنا كمان غلطانين

لأننا ساكتين

والسلام ختام

أميرة علي كوكب مهجور said...

بجد المس؟أله دي محيرة جدا بس انا بفكر ان كل واحد حر مدام مش بيقذيني في حاجة كل واحد حر في علاقته مع ربنا سواء ظهرلي ده من مظهرة او لا و في ناس كتير تبان متدينه وهي غير كده والعكس صحيح

انا مش مع نحكم ع حد من خلال المظهر بس ولا مع اننا نجور ع حريه حد بالفاظ او نظرات لمجرد انه لابس ضيق

ربنامخلقناش علشان نحاكم ونحاسب الناس نحاول احنا نكون احسن

وربنا يهدي الجميع

" sara " said...

للأسف هذه النماذج هي ضحايا عدم التنشئه الصحيحه..والفضائحيات التي تزخ لنا يومياً باسوأ القبح والقرف..
وإستعراض الأجساد النتنه..وكأن المرأه مجرد جسد للإثارة والجنس..
يسوئني حال شبابنا وبناتنا هداهم الله وإقتنائهم أسوأ ماصنعه لنا أعدائنا من إشغالنا بالتوافه..
عندما أستعرض منتدياتنا العربيه واليوتوب..أخجل مما أرى فأكثر إهتماماتهم الجنس وكأن هذه هي قضيتنا العظمى..
بالنسبه لموضوعك فأنا أرى الخطأ على الأثنين إبتدأً بالفتاة التي أرخصت جسدها ولم تحترمه وتستره..فكان من الطبيعي أن تواجه مثل هؤلاء الذئاب الذين يرون من المرأة أنها مخلوقه للمتعه الجسديه فقط..
وكذلك الأهل كيف يروق لهم أن يتركوا بناتهم يخرجون بهذا الشكل في زمن تسعّرت فيه الذئاب البشريه!!
وكذلك الإدارة الجامعيه خاصه وإن جامعاتكم مختلطه فكان من الواجب وضع قوانين تردع مثل هالتفسخ والإنحلال لحماية الفتاة ولإحترام مشاعر الشباب’’
وفقنا الله وإياكم وهدانا لما فيه الخير والصلاح وأصلح مجتمعاتنا لكل خير’’
أتمنى ماأكون هذرت واجد ووضح قصدي
لك مني كل الإحترام والتقدير على طرحك الموفق’’
ووفقك الله لما يحبه ويرضاة’’

كرسي أعتراف said...

يوسف ..... تقبل صداقتي علي طبق من مودة

وبخصوص ما كتبت أنت هنا...

إنها الحرية الشخصية التي تمنح المرأة حرية أختيار ما ترتديه

فالحرية ليست حكرا علي الرجال فقط

TWEETY said...

ازيك ياعمو

عامل ايه

انا مبسوطة ان حضرتك زرت المدونة

Angel said...
This comment has been removed by the author.
Angel said...


يوسف
صباح الياسمين

بداية أنا لاحظت أنك بتختار المواضيع
اللي فعلاً فعلاً فعلاً
جديرة بالنقاش

بالنسبة لموضوع شكل البنات ولبسهم فأنا شايفة أن الموضوع رغم تزايده المتواضح وكثرة الجدال والنقاش عليه
ألا أن مفيش فايدة والمشكلة عمالة تتفاقم ... ونسبة التحرش بتتزايد سواء لفظياً أو فعلياً
وصدقني الأساس هي التنشئة الصحيحة لكلا الطرفين البنات والشباب
أيام الخمسينات والستينات كانوا بيلبسوا الميني جيب ومحدش كان بيعاكس ولا يضايق ألا قلة قليلة وده لأن كل واحد كان عارف أن اخته ومراته وبنات العائلة كلها بيخرجوا كده لكن اتربى على إنها انسانة كويسه مش بمعنى لبسها إنها مش محترمة لكن دلوقتي البنت هي اللي بتجيب الكلام لنفسها والأذى كمان لأننا أصبحنا في عالم الفضائيات والانترنت وأصغر طفل ممكن يكون فاهم كل شيء ومدرك للي أكبر من طفولته

ومليش في الأخر غير أني أدعي ربنا يهدي بناتنا وشبابنا للصراط المستقيم ويبعد عنهم الأذى


دمت بكل ود يوسف

Angel love

Angel said...
This comment has been removed by the author.
mimi said...

ربنا يهدي ويتقبل دعاءك

تحياتي

Yusuf said...

أميرة علي كوكب مهجور

أنا معاكي

مينفعش نتعدي علي حرية الأخرين بالألفاظ أو غيره

ولكن

لبس البنات (ومش كل البنات طبعا ) برضه يعتبر تعدي علي حرية الناس اللي مش عاوزة تشوف المناظر المستفزة دي

واللي كترت أوي اليومين دول

نورتي المدونة

تقبلي تحياتي

Yusuf said...

sara

بعد كلامك مش هلاقي حاجة أقولها

بارك الله فيكي

تقبلي تحياتي

Yusuf said...

كرسي اعتراف

مرحبا بكِ في مدونتي ولكِ كل الود

واختلافنا في الرأي لا يفسد للود قضية

من رأيي

كوني حرة
ولكن لا تغضبي ربك
وفي النهاية هو من سيحاسبك
ولست أنا

دمتي بكل ود

Yusuf said...

TWEETY

ازيك

يارب تكوني دايما بخير

Yusuf said...

Angel

صباح الورد

المشكلة دلوقتي بتكبر لأن الغرب مش عاجبه ان اعداد المتدينين في تزايد ف عن طريق الألة الاعلامية بيحصل اغراق جنسي

المشكلة ان الضحية ف كده بيبقوا اصحاب الثقافة المنخفضة

وده نتيجته المناظر اللي بنشوفها دلوقتي

نورتي المدونة

Yusuf said...

mimi

ربنا يهدي الجميع

تحياتي

Yusuf said...

deleted comments:


no comment !!!!

شاب فقرى said...

السبب عدم وجود اخلاق

وكل سنة وانته طيب

تحياتى

شاب فقرى

Yusuf said...

شاب فقري

من الواضح اننا قريب هنستورد اخلاق صيني

شرفت ونورت

آه وكفى said...

ايه النصب ده ربع ساعة عشان تروح هندسة لألألأ ده انت لو دخلت من باب اداب وخرمت من الاسكوير بتاعها وخرجت تاني من الرئيسي وعديت الشارع برضو مش هتاخد ربع ساعة :))وصلت؟

اول زيارة ليا عندك ههنا وعجبني جدا موضوعك الصراحة
العيال اتهبلت اي والله اتهبلت
و ان مكنش اللبس يبئى المكياج يبئى الالفاظ دع غير ان موضة السجاير كانت في الحمامات بس دلوقتي خرجت من بوتقة السرية وبئت تتشرب في الحرم الجامعي عيني عينك ولا كأنها لبان دكر حسة اني على 2013 هتلائي كل واحد ماسك ساندويتش بطاطس مايونيز في ايد والايد التانية أزازة كونياك مثلاً
ولا بتوع الحرس الجامعي اااااااااه حبة ظباط معرفش بيجبوهم من أنهي داهية ويسبولك اللي حطه 12 كيلو مكياج ولابسة بلوزة بترتر الساعة 1 الضهر ويمسكلوك في اللي شكلها ابن ناس ويقرفوها لأ وبيكرهوا بتوع هندسة يقولك هندسة المخ وتجارة العضلات
في موضة بئى اظرف واظرف ,, الباك بتاع الكلية لولولولولوللللللي .. عجب العجاب وبالاحضان بالاحضان بالاحضان .. بالاحضان يازميلتي ياحلوة بالاحضان ,, مسخرة واحيانا تلائيهم مريحين على اي عربية وبيفكوا على نفسهم شوية طب اللي عايز يهبب حاجة مع اي هبابة يهبب هما احرار بس ميفرجش عليها الخلق كده

فكرتني يوما الاتنين الجاي اول يوم في اللي تولع الكلية والواحد هيشوف وخصوصا دفعة أولى العيال اللي فرحانة بلبس العيد دوول

تحياتي لتركيزك واسلوب سردك و روحوا المحاضرة بدري بئى عيب كده الدكاترة اشتكوا

:D

آه وكفى said...

نزل موضوعك الجاي عن تسقيط البنطلونات والشعر الواقف والحظاظات والسلاسل والحزام ابو فيونكة عريضة

دموع القمر said...

صبااااااح الخيييير

ازيك يايوسف

اخبارك ايه

انا الحمد لله بخير

قولت لازمن اطمنكوا عليا

دعواتك وصلت ربنا يكرمك

اما بالنوسبة للبوست فنو كومينت

واكيد انت عارف ليه!!!!!!!! :)

تحياتى لك

Yusuf said...

آه وكفي

ايه ده وهو انا ساكن قدام باب أداب؟؟

المبني بتاعي ف المدينة أصلا يعتبر في الدقي

وبعدين كلية يوم الاتنين

انا هبدأ من يوم السبت :(

بس مش عايز أشوف أي احضان

ولا أي لبس ضيق ولا عاوز أسمع اي الفاظ

هي سنة فاضلة ربنا يعديها علي خير

نورتي المدونة

Yusuf said...

آه وكفي

انا لو عملت زي مابتقولي الجبهة الشعبية لمحبي نجم الجيل هيقولوا ان انا بهاجمه وبهاجم خيرة شباب البلد اللي بيحبوه

اللي علي راسه بطحة بقا

Yusuf said...

دموع القمر

حمد الله علي سلامتك

ويارب تكوني دايما بخير

وربنا يتم عليكي الشفاء

دمتي بكل ود

dodoo said...

اول زياره ليا فى البلوج وان شاء الله مش اخر زياره

لان بجد مدونتك جميله وبالتوفيق دايما يارب

اما بالنسبه للموضوع بقى

فهى طبعا مش من حقها اطلاقا انها تلبس كده داخل الحرم الجامعى باسم الحريه

لانها داخل حرم جامعى ورايحه " المفروض " تطلب علم

اما هو بقى فمش معنى انها غلطت ان هو كمان يتكلم بالطريقه دى

للاسف احنا مفتقدين قيم كتير جدا فى مجتمعنا

ربنا يهدى كل شباب المسلمين

تحياتى

Yusuf said...

dodoo

فعلا عندك حق

احنا مفتقدين الكتير

شرفتي ونورتي

Sometimes said...

السلام عليكم
بجد عجبنى جدا انك فى نهاية البوست ده وبوست صياد وجهت نظرك للسماء
:)
ملناش غيره بجد

تحياتى
اسلوبك جميل فى الكتابة ما شاء الله

انت تسال والكمبيوتر يجيب said...

نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

Yusuf said...

Sometimes

فعلا ملناش غيره

نورتي

وربنا يديم التواصل

تحياتي

الكنز المفقود said...

هو ده بس اللى فالحرم الجامعى ده بقى فى مناظر استغفر الله العظيم الواحد يتكسف اصلا انه يتكلم عنها اشكال ولاد وبنات متحسش انهم رايحين يتعلموا

الحرم الجامعى مبقاش جامعى خالص

بس يمكن السبب غياب الدين والتقاليد والعادات الشرقيه التى بدات انت تتلاشى مع الوقت
فبانعدام الدين انعدمت الاخلاق وغاب الاهل وغبنا نحن عما يجب علينا ان نفعله تجاه هذه الاشياء

موضوع مهم فعلا وبقى موجود كتييييييير
ربنا يسترها علينا وعلى المسلمين اجمعين

دمت بخير يا يوسف